|
അകില് |
ആയുര്വേദത്തിലെ ഒരു ഔഷധ സസ്യമാണ് അകില്. അകില് പലതരത്തില് കാണപ്പെടുന്നു എങ്കിലും, സാധാരണയായി കറുത്ത അകിലാണ് ഔഷധങ്ങള്ക്കായി കൂടുതലായും ഉപയോഗിക്കുന്നത്. ഇത് കൂടൂതലായും ത്വക്ക് രോഗങ്ങളുടെ ശമനത്തിനായും വാതത്തിന്റേയും കഫത്തിന്റേയും ദേഷങ്ങള് അകറ്റുന്നതിനായി ഔഷധമായി ഉപയോഗിക്കുന്നു. കൂടാതെ നേത്രരോഗങ്ങള്ക്കും കര്ണ്ണരോഗങ്ങള്ക്കും സാധാരണ ഉപയോഗിക്കുന്നു
ഔഷധം
തടിയും എണ്ണയുമാണ് പ്രധാന ഔഷധങ്ങള്. അകില് മരത്തില് നിന്നും ഉത്പാദിപ്പിക്കുന്ന എണ്ണ വൃണം, വിഷം, കുഷ്ഠം, ചൊറി എന്നീ അസുഖങ്ങള്ക്കെതിരെയുള്ള ഔഷധമായി ആയുര്വേദ ചികിത്സയില് ഉപയോഗിക്കുന്നു.
കൂടാതെ അരിമ്പാറ, ആണിരോഗം തുടങ്ങിയസുഖങ്ങള്ക്ക് പൊല്കാരം അകിലിന്റെ എണ്ണ ചേര്ത്ത് ചാലിച്ച് പുരട്ടുന്നു. ഇതിന്റെ തടിച്ചീളുകളും തടിപൊടിച്ചെടുത്ത ചൂര്ണവും സുഗന്ധ ധൂപനത്തിന് ഉപയോഗിച്ചുവരുന്നു. ഈ ധൂപനം വ്രണരോപണത്തിനും അന്തരീക്ഷത്തിലുള്ള അണുക്കളെ നശിപ്പിക്കുന്നതിനും സഹായകമാണ്.
കൂടാതെ തകരയുടെ വേര് അകിലെണ്ണയില് അരച്ച് നെറ്റിയില് തേച്ചുപിടിപ്പിച്ചാല് തലവേദന മാറുന്നതായി ആയുര്വേദത്തില് പറയുന്നു.
സുഗന്ധലേപനം
അറബികള്ക്ക് ഏറ്റവും പ്രിയം നിറഞ്ഞ സുഗന്ധലേപനമാണ് ഊദ്.മരത്തടി, കൊള്ളി എന്നാണ് ഊദ് എന്ന വാക്കിനര്ഥം. അകില് ഉള്പ്പെടുന്നതും ഊദിനെയാണ്. കമ്പോഡിയ, ഇന്ത്യയിലെ ആസാം എന്നിവിടങ്ങളില് ഊദ് സമൃദ്ധമായി ഉത്പാദിപ്പിക്കുന്നത്.
ഏകദേശം 20 വര്ഷത്തോളം വളര്ച്ചയെത്തിയ അകില് മരത്തിന്റെ ചില ശാഖകളില് ഒരുതരം ഫംഗസ് രോഗം പിടിപെടുകയും രോഗം ബാധിച്ച ശാഖ ക്രമേണ കറുക്കുകയും സുഗന്ധവാഹിയായി തീരുകയും ചെയ്യുന്നു. ഇതില് സുഗന്ധം തങ്ങിനില്ക്കുന്ന കറ ആല്ക്കഹോളിക സ്വേദനത്തിന് വിധേയമാകുമ്പോള് ബാഷ്പശീലമുള്ള തൈലം ലഭിക്കുന്നു. ഈ തൈലം അഗര് അഥവാ അഗര് അത്തര് എന്നപേരില് അറിയപ്പെടുന്നു. അഗര് എന്ന സുഗന്ധതൈലം ലഭിക്കുന്നതിനാലാണ് ഈ വൃക്ഷത്തിന് അഗര് എന്ന പേര് സിദ്ധിച്ചത്. ഈ തൈലം സുഗന്ധ ലേപനങ്ങളില് ചേര്ക്കാറുണ്ട്. ഊദും ഊദിന്റെ അത്തറും എന്ന പേരില് ഇത് പ്രസിദ്ധമാണ്.
പേര് പോലെ തന്നെ പുളിരസത്തോടു കൂടിയ ഔഷധസസ്യമാണ് പുളിയാറില. ദഹനസംബന്ധമായ പ്രശനങ്ങള്ക്ക് പ്രധിവിധിയായി പുളിയാറില ഉപയോഗിക്കുന്നു. ഗ്രഹണി,അര്ശസ്സ്, എന്നിവയ്ക്കും, രുചിയുണ്ടാക്കാനും, പുളിയാറില നല്ലത് തന്നെ. പുളിയാറില കഴുകി അങ്ങനെ തന്നെ ചവച്ചു തിന്നുകയോ, ചമ്മന്തിയാക്കിയോ, പുളിശ്ശേരി വെച്ചോ കഴിക്കാവുന്നതാണ്. തണ്ട് ഒടിച്ചു നട്ടോ, വിത്തുപാകിയോ-ചട്ടിയിലോ, വെറും മണ്ണിലോ വളര്ത്താവുന്നതാണ്. ഇതിന്റെ വിത്തുകള് വളരെ ചെറുതാണ്. പഴയ കല്ലുകെട്ടിയ കിണറുകളുടെ കല്ലിടുക്കുകളിലും ഈ ഔഷധസസ്യം വളര്ന്നു നില്ക്കുന്നത് കാണാം. വലിയ പരിചരണമോ വളപ്രേയോഗമോ കൂടാതെ വളരെ വേഗത്തില് വളരുന്ന ഈ ഔഷധസസ്യം ആര്ക്കും നട്ടുപിടിപ്പിക്കാവുന്നതേയുള്ളൂ.
പണ്ട് കേരളത്തിലെ ഒട്ടുമിക്ക വീടുകളിലും ഉണ്ടായിരുന്നതും ഇപ്പോള് അന്യമായി കൊണ്ടിരിക്കുന്നതുമായ ഞാവലിനെ കുറിച്ചാണ് ഇന്ന് പറയുന്നത്. ഞാവല് പഴം എന്ന് കേട്ടാല് ആദ്യം നമ്മുടെ മനസ്സിലേക്ക് ഓടി എത്തുന്നത് അതിന്റെ നിറമാണ്. അത് കഴിച്ചു കഴിഞ്ഞാല് വായും ചുണ്ടും നീല കലര്ന്ന കറുപ്പ് നിറമാകും എന്ന ഒറ്റ ദോഷം മാത്രമേ ഞാവല് പഴത്തിനുള്ളൂ ബാക്കി തോന്നൂറ്റൊന്പതും ഗുണങ്ങളാണ്.
ഞാവല് മരത്തിന്റെ ഇലയും തൊലിയും പഴങ്ങളും കുരുവും എല്ലാം തന്നെ ഔഷധ ഗുണങ്ങളുടെ കലവറയാണ്.പ്രമേഹം കുറയ്ക്കാന് ഞാവല് പഴത്തിന്റെ കുരുവിന് അപാരമായ കഴിവുണ്ട്. പഴം കഴിക്കുന്നത് വയറിനു സുഖം തരികയും, മൂത്രം ധാരാളം പോകുന്നതിനു സഹായിക്കുകയും ചെയ്യുന്നു.അര്ശസ്സ്, വയറുകടി, വിളര്ച്ച എന്നിവയ്ക്ക് ഞാവല് പഴം കഴിക്കുന്നത് ഗുണകരമാണ്. വായിലുണ്ടാകുന്ന മുറിവിനും പഴുപ്പിനും ഞാവല് തൊലി കഷായം നല്ലതാണെന്ന് ആയുര്വേദം പറയുന്നു. ഞാവല് പഴത്തില് ജീവകം-എ, ജീവകം-സി, പ്രോട്ടീന്, ഫോസ്ഫറസ്, കാല്സിയം, ഫൈബര് എന്നിവയും അടങ്ങിയിട്ടുണ്ട്. വൈന് ഉണ്ടാക്കാനും ഞാവല് പഴം നല്ലതാണ്. ഇത്രയേറെ ഗുണങ്ങള് ഉള്ളപ്പോള് ഒന്ന് നന്നായി കഴുകിയാല് മാറുന്ന നിറം ഓര്ത്തു ഞാവല് പഴം കഴിക്കാതിരിക്കണ്ട അല്ലെ!!!
മുരിങ്ങയും ചീരയും തോരനും നിത്യ ഭക്ഷണത്തിന്റെഭാഗമായിരുന്ന ഒരു കാലമുണ്ടായിരുന്നു മലയാളിക്ക്. തൊടിയിലും പറമ്പിലും നട്ടുപിടിപ്പിച്ച ചെടികളില് നിന്ന് പറിച്ചെടുത്ത കീടനാശിനിയേതുമില്ലാത്ത ഫ്രഷ് ഇലകള് കറിവെച്ചും ഉപ്പേരിയുണ്ടാക്കിയും നമ്മുടെ പഴയ തലമുറ ഭക്ഷണം പോഷക സമൃദ്ധമാക്കി.
പക്ഷെ ഇന്ന് മലയാളിയുടെ ഭക്ഷണ ശീലം ഏറെ മാറിപ്പോയി. ചിക്കനും ബര്ഗറുമില്ലാത്ത ഭക്ഷണം നമുക്കിന്ന് ഇല്ലെന്ന് തന്നെ പറയാം. ഇലകളും പച്ചക്കറികളും തീന്മേശയില് കാണുന്നത് തന്നെ പുതിയ തലമുറക്ക് ഇഷ്ടമല്ല.
അവയൊന്നും തന്െറ പാത്രത്തില് വീഴാതിരിക്കാന് അവര് പ്രത്യേകം ശ്രദ്ധ വെക്കും.
എന്നാല് മന:പൂര്വം നമ്മുടെ ഭക്ഷണ ശീലങ്ങള് ക്രമീകരിക്കേണ്ട കാലം എന്നേ അതിക്രമിച്ചിരിക്കുന്നു. അവയില് ഉള്പ്പെടുത്തേണ്ട വളരെ പ്രധാനപ്പെട്ട ഇനമാണ് ഇലക്കറികള്. പ്രത്യേകിച്ചും മുരിങ്ങയില.
വിററാമിനുകളുടെയും ഇരുമ്പിന്റെും ഫോസ്ഫറസിന്റെും കലവറ തന്നെയാണ് മുരിങ്ങയില. വിറ്റാമിന് എ, വിറ്റാമിന് ബി, വിറ്റാമിന് സി, വിറ്റാമിന് ഡി, വിറ്റാമിന് ഇ എന്നിവ അതില് അടങ്ങിയിരിക്കുന്നു.
പാലില് അടങ്ങിയിരിക്കുന്നതിനേക്കാള് രണ്ട് മടങ്ങ് കാല്സ്യവും ചീരയിലുള്ളതിനേക്കാള് മൂന്നിരട്ടി ഇരുമ്പും മുരിങ്ങയില് ഉണ്ട്. ഇതോടൊപ്പം ശരിയായ ശോധനക്കും മുരിങ്ങയില ഉപകരിക്കും.
ആയുര്വേദത്തില് നിരവധി ഔധങ്ങളില് മുരിങ്ങ ഉപയോഗിക്കുന്നുണ്ട്.
ചര്മ സംരക്ഷണത്തിനും മുരിങ്ങയില നല്ലതാണ്. ഇല മാത്രമല്ല മുരിങ്ങക്കായയും അതിന്െറ വിത്തും പോഷക സമ്പന്നം തന്നെയാണ്.
മുരിങ്ങയില നീര് രക്ത സമ്മര്ദ്ദം സാധാരണ നിലയിലാക്കാന് നല്ലതാണ്.
മുരിങ്ങയില സ്ഥിരമായി കഴിക്കുന്നത് കുട്ടികളില് ബുദ്ധി ശക്തി വര്ധിക്കുന്നതിന് സഹായിക്കുമെന്നും പഴമക്കാര് പറയുന്നു. പാലിലും കോഴിമുട്ടയിലും അടങ്ങിയിരിക്കുന്നതിനേക്കാള് കൂടുതല് പ്രോട്ടീനും മുരിങ്ങയില് അടങ്ങിയിട്ടുണ്ട്.
പ്രത്യേകം പരിചണമൊന്നുമില്ലാതെ വളരുന്ന ചെടിയാണ് മുരിങ്ങ. നമ്മുടെ വീട്ടുമുറ്റത്ത് മുരിങ്ങ നട്ടുപിടിപ്പിച്ചാല് വിഷമില്ലാത്ത പുത്തന് ഇലകള് കൊണ്ട് നമുക്ക് ആഹാരം പോഷകസമൃദ്ധമാക്കാം. ഒപ്പം ആരോഗ്യവും സംരക്ഷിക്കാം