നിലവേപ്പ്, കിരിയത്ത്

ഇന്ത്യയിലും ശ്രീലങ്കയിലും നൈസർഗ്ഗികമായി കണ്ടുവരുന്ന ഒരു ഔഷധ സസ്യമാണ് നിലവേപ്പ് അഥവാ കിരിയത്ത്. ദക്ഷിണ ഏഷ്യയിൽ ചില പകർച്ച വ്യാധികൾക്കും മറ്റുമുള്ള മരുന്നിനായ് ഇവ ധാരാളം കൃഷി ചെയ്തു വരുന്നു. സാധാരണയായി ഇവയുടെ ഇലകളും വേരുകളും ചികിത്സക്കായി ഉപയോഗിക്കുന്നു. ആയുർവ്വേദത്തിൽ ത്രിദോഷശമനത്തിനായും ത്വൿ രോഗങ്ങൾക്കും ചുമ, ശ്വാസം മുട്ട്, നെഞ്ചെരിച്ചിൽ എന്നിവയ്ക്കു് മരുന്നായി സമൂലം ഉപയോഗിക്കപ്പെടുന്നുണ്ടു്. നിലവേപ്പിന്റെ ഇലകൾക്കും മറ്റു സസ്യഭാഗങ്ങൾക്കും കടുത്ത കയ്പ്പുരുചിയാണുള്ളതു്. ഇലകൾ കടും പച്ച. മെലിഞ്ഞ് ചതുർഭുജാകൃതിയിൽ നീണ്ടു വളരുന്ന തണ്ട് 50 സെന്റിമീറ്റർ വരെ ഉയരത്തിൽ വളരാം. ആയുർവ്വേദമനുസരിച്ച് ചെടിയ്ക്ക് തിക്തരസവും ലഘുരൂക്ഷഗുണവും ഉഷ്ണവീര്യവും ആണുള്ളതു്. കയ്പ്പുരസമുള്ള ഔഷദസസ്യങ്ങളുടെ വിഭാഗത്തില്പ്പെടുന്നു. കിരിയാത്ത, ഭൂനിംബ, മഹാതിക്തക എന്ന പേരിലൊക്കെ അറിയപ്പെടുന്നു. ഹിമാലയ പ്രാന്തങ്ങളിലും കാശ്മീർ മുതൽ അസ്സം വരേയും കാടുകളിൽ കാണുന്നു. കേരളത്തിൽ ഔഷധ ആവശ്യങ്ങൾക്കായി കൃഷി ചെയ്യുന്നതായി കാണുന്നു.

കാർക്കോട്ടി, മോതിരക്കണ്ണി (ശാസ്ത്രീയനാമം: Hugonia mystax)

ഇന്ത്യയിലെല്ലായിടത്തും വരണ്ടകാടുകളിൽ കാണപ്പെടുന്ന ഒരു കുറ്റിച്ചെടിയാണ് കാർക്കോട്ടി. (ശാസ്ത്രീയനാമം: Hugonia mystax). മോതിരക്കണ്ണി എന്നും പേരുണ്ട്. Linaceae കുടുംബത്തിലെ പടരുന്ന ചെടിയാണ്.

കാവളം, പീനാറി, പൊട്ടക്കാവളം, തൊണ്ടി, കൈതൊണ്ടി (ശാസ്ത്രീയനാമം: Sterculia guttata).

മാൽവേസീ സസ്യകുടുംബത്തിൽപ്പെടുന്ന 20 മീറ്റർ വരെ ഉയരം വയ്ക്കുന്ന ഒരു മരമാണ് കാവളം. (ശാസ്ത്രീയനാമം: Sterculia guttata). പീനാറി, പൊട്ടക്കാവളം, തൊണ്ടി, കൈതൊണ്ടി എന്നീ പേരുകളിലും അറിയപ്പെടുന്നു.. പശ്ചിമഘട്ടത്തിൽ കാണപ്പെടുന്ന ഈ മരത്തിന്റെ ഇലകൾ വട്ടത്തിലോ ഹൃദയാകൃതിയിലോ ആണ്. 
മനോഹരമായ പൂക്കളും ഭംഗിയുള്ള കായകളും ഉള്ള ഈ മരത്തിൽ ആൺപൂക്കളാണ് പ്രധാനമായും ഉള്ളത്. പൂക്കളുടെ ദളങ്ങളുടെ ഉൾഭാഗം പർപ്പിൾ കലർന്ന നിറത്തിലും പൂക്കൾ മഞ്ഞ നിറത്തിലുമാണ് കാണപ്പെടുന്നത്. കായുടെ പുറം വെൽവെറ്റ് പോലെ തോന്നിക്കുന്നു. കുരുവിൽ നിന്നുമെടുക്കുന്ന രാസപദാർത്ഥത്തിന്‌ കൊതുകിന്റെ കൂത്താടിയെ നശിപ്പിക്കാനുള്ള കഴിവുണ്ട്‌. വിത്തു വറുത്തു തിന്നാറുണ്ട്. മരത്തിന്റെ തൊലിയിൽ നിന്നും നല്ല നാരു കിട്ടും. മലയണ്ണാൻ ഇത് ആഹാരമാക്കാറുണ്ട്. ചെറിയ ആപ്പിളിന്റെ വലുപ്പമുള്ള ഫലത്തിൽ ഒന്നു മുതൽ അഞ്ചു വരെ അറകളുണ്ട്. പശ്ചിമഘട്ടത്തിലും ഇന്തോ-മലേഷ്യയിലും സമൃദ്ധമായി വളരുന്നു. സമുദ്രനിരപ്പിൽ നിന്നും 900 മീറ്റർ ഉയരമുള്ള പ്രദേശങ്ങളിൽ കാണപ്പെടുന്നു.
തടിക്ക് കാതലും വെള്ളയുമുണ്ട്. കാതലിന് ഈടും ഉറപ്പും കുറവാണ്. കളിപ്പാട്ടങ്ങളും പായ്ക്കിങ്ങ് പെട്ടികളും നിർമിക്കാൻ ഉപയോഗിച്ച് വരുന്നു. മരത്തൊലിയിൽ നിന്ന് ഒരിനം നാരും 'കതിരഗം' എന്നറിയപ്പെടുന്ന ഒരിനം പശയും ലഭിക്കുന്നു. ഈ പശ തൊണ്ടവേദനയ്ക്ക് ഉത്തമൗഷദമായി ഉപയോഗിക്കാറുണ്ട്.

മലഇഞ്ച, കക്കിഞ്ച, കാരിഞ്ച (ശാസ്ത്രീയനാമം: Acacia pennata)

ഒരു ചെറുമരം എന്നു തന്നെ വിശേഷിപ്പിക്കാവുന്ന ബഹുവർഷിയായ ഒരു വള്ളിച്ചെടിയാണ് മലഇഞ്ച അഥവാ കക്കിഞ്ച എന്നറിയപ്പെടുന്ന കാരിഞ്ച. (ശാസ്ത്രീയനാമം: Acacia pennata). ചെറുതാവുമ്പോൾ പച്ചനിറത്തിലുള്ള ശിഖരങ്ങൾ വളരുമ്പോൾ ചാരനിറമാവുന്നു. തടിയിൽ മുള്ളുകളുണ്ട്. കുട്ടികളിലെ ദഹനക്കേടിന് മരുന്നായി ഉപയോഗിക്കാറുള്ള കാരിഞ്ച കേരളത്തിൽ എല്ലായിടത്തും കാണാറുണ്ട്.

കാരമരം, കരിവെള്ള, ഇല്ലക്കട്ട, കാരിവെള്ള (ശാസ്ത്രീയനാമം: Diospyros paniculata).

കേരളത്തിലെ പശ്ചിമഘട്ടത്തിൽ കണ്ടുവരുന്ന ഒരു നിത്യഹരിതവൃക്ഷമാണ് കാരമരം (ശാസ്ത്രീയനാമം: Diospyros paniculata). കരിവെള്ള, ഇല്ലക്കട്ട, കാരിവെള്ള എന്നെല്ലാം അറിയപ്പെടുന്നു. ഉറപ്പും ബലവുമില്ലാത്ത ഭാരം കുറഞ്ഞ തടി. തളിരിലയ്ക്ക് മഞ്ഞനിറം. 



ആൺപൂവും പെൺപൂവും വെവ്വേറേ മരങ്ങളിൽ ഉണ്ടാവുന്നു. തൊലിയും കായും ഔഷധഗുണമുള്ളവയാണ്. 16 മീറ്റർ വരെ ഉയരം വയ്ക്കും. 1200 മീറ്റർ വരെ ഉയരമുള്ള നനവുള്ള നിത്യഹരിതവനങ്ങളിലാണ് കാണുന്നത്. ഇലകൾ മൽസ്യങ്ങൾക്ക് വിഷമാണ്.വംശനാശഭീതിയുണ്ട്.

കാര, കരിമുള്ളി, കരണ്ടിപ്പഴം, കാരക്ക, ചെറി,കരോണ്ട, കറുത്തചെറി (ശാസ്ത്രീയനാമം: Carissa carandas)

അച്ചാറിടാൻ പറ്റിയ ചെറിയ കായകൾ ഉണ്ടാകുന്ന ഒരു മുൾച്ചെടിയാണ് കാര. കരിമുള്ളി, കരണ്ടിപ്പഴം, കാരക്ക, ചെറി,കരോണ്ട, കറുത്തചെറി എന്നെല്ലാം ഇത് അറിയപ്പെടുന്നു. (ശാസ്ത്രീയനാമം: Carissa carandas). ധാരാളം ഇരുമ്പും ജീവകം സി യും അടങ്ങിയിട്ടുണ്ട് ഈ കായകളിൽ. പച്ച നിറമുള്ള കായ വിളയുമ്പോൾ ചുവക്കും. ഇലയും കായും ഔഷധഗുണമുള്ളവയാണ്. നിറയെ പടലമുള്ള വേരുകൾ മണ്ണൊലിപ്പ് തടയാൻ പര്യാപ്തമായവയാണ്. ഇലകൾ പട്ടുനൂൽപ്പുഴുക്കൾക്ക് ഭക്ഷണമായി നൽകാറുണ്ട്, ചതച്ച വേര് ഈച്ചകളെ അകറ്റാൻ ഉപയോഗിക്കാറുണ്ട്.  ഇന്ത്യയിൽ എല്ലായിടത്തും വന്യമായി വളരുന്നുണ്ട്.

വരണ്ട പ്രദേശങ്ങളിൽ ധാരാളമായി വളരുന്ന മുൾച്ചെടി വിഭാഗം ആണ് . പഴങ്ങൾ ചെറിപ്പഴത്തോട് സാമ്യം .ചെറിയ ചുവന്ന കുലകൾ ആയ പഴങ്ങൾ അച്ചാർ, ജാം, ജെല്ലി എന്നിവയുണ്ടാക്കാൻ ഉപയോഗിക്കുന്നു. വളരുന്ന ഒരിനം വലിയ കുറ്റിച്ചെടിയാണ് കാര. ബേക്കറിയിൽ നിന്നും ലഭിക്കുന്ന ചുവന്ന ചെറിപ്പഴം ഉണ്ടാക്കാനുപയോഗിക്കുന്ന പഴമാണ് കാര അഥവ കരോണ്ട (ബേക്കറി ചെറി). അപ്പോസൈനേസീ കുടുംബത്തിൽ പെടുന്ന ഇവയുടെ ശാസ്ത്രനാമം കരിസ്സ കരാൻഡസ് എന്നാണ്.
ആഗസ്ത് മാസാവസാനത്തോടെ പാകമാകുന്ന പഴങ്ങൾ ആദ്യം ഇളം മഞ്ഞ കലർന്ന ചുവപ്പും പിന്നീട് ചുവപ്പും മൂക്കുന്നതോടെ കറുപ്പും ആയി വരും . അയൺ , വിറ്റാമിൻ -സി എന്നിവ ധാരാളമായി അടങ്ങിയിരിക്കുന്നു .വിത്ത് മുളപ്പിച്ചാണ് പുതിയ തൈകൾ ഉണ്ടാക്കുന്നു.

കാരമുള്ള് (ശാസ്ത്രീയനാമം: Canthium coromandelicum). ചെറുകാര, കാര, കണ്ടകാര

5 മീറ്ററോളം ഉയരം വയ്ക്കുന്ന, മുള്ളുകളുള്ള ഒരു കുറ്റിച്ചെടിയാണ് കാരമുള്ള്. (ശാസ്ത്രീയനാമം: Canthium coromandelicum). ചെറുകാര, കാര, കണ്ടകാര എന്നെല്ലാം വിളിക്കുന്നു. വേരും ഇലയും പലവിധ ഔഷധങ്ങൾക്കായി ഉപയോഗിക്കുന്നു. പാമ്പുവിഷത്തിനും ഔഷധമാണ്. Common Silver Line ശലഭത്തിന്റെ ലാർവകൾ ഇതിന്റെ ഇലകൾ ആഹരിക്കാറുണ്ട്.

കാരച്ചുള്ളി

അഞ്ചുമീറ്റർ വരെ ഉയരം വയ്ക്കുന്ന നിറയെ മുള്ളുകളുള്ള ഒരു ഔഷധസസ്യമാണ്‌ കാരച്ചുള്ളി. (ശാസ്ത്രീയ നാമം: Catunaregam spinosa.). കാപ്പി കുടുബമായ റുബിയേസീ സസ്യകുടുംബത്തിലെ ഇക്സൊറോയിഡീ ഉപകുടുംബത്തിലാണ് ഇവ ഉൾപ്പെടുന്നത്.

ഗ്ലോറി ലില്ലി (Gloriosa superba), കിത്തോന്നി, മേന്തോന്നി, പറയന്‍ചെടി, അഗ്നിശിഖ, ചെകുത്താന്‍പൂവ്

ഗ്ലോറി ലില്ലി’ എന്നറിയപ്പെടുന്ന പടര്‍ന്നു കയറുന്ന ‘ഗ്ലോറിയോസാ സുപ്പര്‍ബ‘(Gloriosa superba) മലയാളത്തില്‍ കിത്തോന്നി എന്നും മേന്തോന്നി എന്നും പറയന്‍ചെടി എന്നും അറിയപ്പെടുന്നു.  
നിറത്തിലും ആകൃതിയിലുമുള്ള പ്രത്യേകത കൊണ്ടാവാം, ഇതിന്റെ പൂവിനെ അഗ്നിശിഖ, ചെകുത്താന്‍പൂവ് എന്നൊക്കെ ചിലയിടങ്ങളില്‍ വിളിക്കുന്നത്. 

വിരിയുമ്പോള്‍ മഞ്ഞനിറമുള്ള മനോഹരമായ പൂക്കള്‍ ഉണ്ടാകുന്നു. അതിനുശേഷം പൂക്കളുടെ നിറം കടും ചുവപ്പോ, ഓറഞ്ചു ചുവപ്പോ ആകുകയും ദളങ്ങള്‍ വളഞ്ഞ് പിരിയുകയും ചെയ്യുന്നു. ഇതിന്‍റെ കിഴങ്ങുകള്‍ നീളമുള്ളതും പെന്‍സിലിന്റെ വണ്ണമുള്ളതാണ്. മാര്‍ച്ച്-ഏപ്രില്‍ മാസങ്ങളില്‍ ഇതിന്‍റെ കിഴങ്ങുകള്‍ നടണം. ജൂലൈ-സെപ്റ്റംബര്‍ മാസങ്ങളില്‍ പൂക്കള്‍ ഉണ്ടാകുന്നു.

Gloriosa superba

വേലികളിലും മറ്റും പടര്‍ന്നുകയറുന്ന ഒരു ഔഷധസസ്യം. ഇതിന്റെ കിഴങ്ങ് പ്രധാനമായും വിഷചികിത്സയ്ക്കും, ത്വക്ക് രോഗശമനത്തിനും ഉപയോഗിക്കുന്നു. അധികം കഴിച്ചാല്‍ മരണം വരെ സംഭവിക്കാമത്രേ. പഴയകാലത്ത് ഗര്‍ഭഛിദ്രത്തിനും, പ്രസവം വേഗത്തിലാക്കാനുമൊക്കെ മേന്തോന്നിക്കിഴങ്ങ് ഉപയോഗിച്ചിരുന്നത്രേ. വിഷാംശമുള്ളതുകൊണ്ടാവാം, ഇതിന്റെ ഇല അരച്ചു പിഴിഞ്ഞെടുത്ത നീര് പേന്‍നാശിനിയായും ഉപയോഗിച്ചിരുന്നു.

തുപ്പലംപൊട്ടി അഥവാ വേലിപടക്കം (ശാസ്ത്രനാമം: Asystasia gangetica)

വേലിപടർപ്പുകളിൽ സാധാരണയായി കണ്ടുവരുന്ന ഒരു സസ്യമാണ് തുപ്പലംപൊട്ടി അഥവാ വേലിപടക്കം. ഇതിന്റെ മൂത്ത് ഉണങ്ങിയ കായ (വിത്ത്) വെള്ളം നനഞ്ഞാൽ അതിന്റെ തൊണ്ട് പൊട്ടി വിത്ത് ചിതറും. ഈ സ്വഭാവമുള്ളതുകൊണ്ട് ഇത് കുട്ടികൾക്ക് ഒരു ആകർഷണമാണ്. തുപ്പലം (ഉമിനീര്) വിരലിൽ പറ്റിച്ച് കുട്ടികൾ ഇത് പൊട്ടിക്കുന്നതുകൊണ്ടാണ് ഇതിനെ തുപ്പലംപൊട്ടി എന്ന് വിളിക്കുന്നത്. 

Acanthaceae കുടുംബത്തിൽ പെട്ട ഈ സസ്യത്തിന്റെ ശാസ്ത്രനാമം Asystasia gangetica എന്നാണ്. ചൈനീസ് വൈലറ്റ് എന്ന പേരിലും അറിയപ്പെടുന്നു. മണ്ണിൽ പരന്ന് വളരുന്ന കുറ്റിച്ചെടിസ്വഭാവമുള്ള ഈ സസ്യം എന്തെങ്കിലും താങ്ങുസഹായം ലഭിക്കുകയാണെങ്കിൽ ഒരു മീറ്റർ ഉയരം വരെ വളരും. 
ഒരുവിധം എല്ലാ രാജ്യങ്ങളിലും ഈ സസ്യത്തെ കാണാം. നാട്ടുവൈദ്യത്തിൽ ഇതിന്റെ ഇല ആസ്മയ്ക്കുള്ള മരുന്നായി ഉപയോഗിക്കുന്നുണ്ട്.  കുറ്റിച്ചെടി സ്വഭാവത്തിൽ വളരുന്നതിനാൽ ഇത് തേനീച്ച, പൂമ്പാറ്റ, മറ്റ് ജീവികൾ ഇവയുടെയെല്ലാം ആവാസവ്യവസ്ഥയിൽ നിർണ്ണായക പങ്കുവഹിക്കുന്നു.

കാശിത്തുമ്പ

ഗാർഡൻ ബാൽസം (Garden Balsam) എന്നു ലത്തീൻ ഭാഷയിൽ അറിയപ്പെടുന്ന കാശിത്തുമ്പ, കിഴക്കെ ദക്ഷിണേഷ്യയിലാണ് കണ്ടുവരുന്നത്. 20 മുതൽ 75 സെന്റിമീറ്റർ വരെ ഉയരത്തിൽ വളരുന്ന, കട്ടിയുള്ളതും എന്നാൽ ദുർബലവുമായ കാണ്ഡത്തോടുകൂടിയ ഒരു വാർഷിക സസ്യമാണിത്. ഇലകൾ സർപ്പാള ആകൃതിയിൽ അടുക്കിവെച്ചതുപോലെ കാണപ്പെടുന്നു. ഇവയ്ക്ക് 2.5–9 സെന്റീമീറ്റർ നീളവും 1–2.5 സെന്റീമീറ്റർ വീതിയും വാളിന്റെ വായ്‌ത്തലയ്ക്ക് സമാനമായ അരികുകളും കാണപ്പെടുന്നു.

 ഇവയുടെ പൂക്കൾ ശ്വേതരക്തവർണ്ണം (പിങ്ക്), ചുവപ്പ്, വെള്ള, ധൂമ (പർപ്പിൾ) നിറങ്ങളിൽ കണ്ടുവരുന്നു. 2.5–5 സെന്റീമീറ്റർ വ്യാസമുൾള്ള പൂക്കളിൽ തേനീച്ച, തേൻ കുടിക്കാനെത്തുന്ന പക്ഷികൾ എന്നിവ വഴി പരാഗണം നടക്കുന്നു. ഈ ചെടിയുടെ വിവിധ ഭാഗങ്ങൾ ചർമ്മ സംബന്ധമായ രോഗങ്ങൾക്കും മറ്റ് ചില അസുഖങ്ങൾക്കുമുള്ള മരുന്നിനുമായി ഉപയോഗിക്കുന്നുണ്ട്. ഇവയുടെ ഇല, വിത്ത്, കാണ്ഡം എന്നിവ പാചകം ചെയ്താൽ ഭക്ഷ്യയോഗ്യമാണ്. ഇവയുടെ ഇലകളുടെ നീര് അരിമ്പാറ, പാമ്പ്കടി എന്നിവയുടെ ചികിത്സക്കായി ഉപയോഗിക്കാറുണ്ട്. പൂക്കൾ പൊള്ളലേറ്റ ചർമ്മങ്ങളിൽ തണുപ്പ് നൽകാനായി ഉപയോഗിക്കുന്നു. പസഫിക്ക് സമുദ്രത്തിലെ ദ്വീപുകളിൽ വന്‌തോതിൽ അലങ്കാര സസ്യമായി ഇവ കൃഷി ചെയ്തുവരുന്നു.

കാന്തക്കമുക്, കാന്തൾ, കാട്ടുകമുക്, പാറപ്പാക്ക്, വാരക്കമുക് (ശാസ്ത്രീയനാമം: Bentinckia condapanna).

പശ്ചിമഘട്ടതദ്ദേശവാസിയായ ഒരുതരം കമുകാണ് കാന്തക്കമുക്. (ശാസ്ത്രീയനാമം: Bentinckia condapanna). കാന്തൾ, കാട്ടുകമുക്, പാറപ്പാക്ക്, വാരക്കമുക് എന്നീ പേരുകളിലും ഈ വൃക്ഷം അറിയപ്പെടുന്നു. ആവാസവ്യവസ്ഥയുടെ നാശം മൂലം വംശനാശഭീഷണി നേരിടുന്ന ഒരു സസ്യമാണിത്. 15 മീറ്ററോളം ഉയരം വയ്ക്കും. 1000 മുതൽ 1900 മീറ്റർ വരെ ഉയരമുള്ള മലനിരകളിൽ കാണുന്നു. സംരക്ഷിതപ്രദേശങ്ങളിലും പല സസ്യോദ്യാനങ്ങളിലും വളർത്തിവരുന്നു. ആദിമനിവാസികൾ ഈ മരത്തിന്റെ ഉള്ളിലുള്ള ഭാഗം ആഹാരമാക്കാറുണ്ട്. വളരെ വേഗം വളരുന്ന ഒരു വൃക്ഷമാണിത്.

കാനവാഴ (ശാസ്ത്രീയനാമം: Commelina benghalensis)

മധ്യരേഖാപ്രദേശങ്ങളിലെ തദ്ദേശവാസിയായ ഒരു കുറ്റിച്ചെടിയാണ് കാനവാഴ. (ശാസ്ത്രീയനാമം: Commelina benghalensis). ശല്യക്കാരനായ ഒരു കളയായി ഇതിനെ കരുതിപ്പോരുന്നു. കാലിത്തീറ്റയായും പച്ചക്കറിയായും ഔഷധസസ്യമായും ഇതിന് ഉപയോഗമുണ്ട്.

കാട്ടുഴുന്ന്

ഫാബേഷ്യേ കുടുംബത്തിൽപ്പെട്ട, ചുറ്റിപ്പിണഞ്ഞ് നിലം പറ്റി, വർഷത്തിൽ എല്ലാസമയത്തും വളരുന്ന സസ്യം. തണ്ടുകൾക്ക് 30 സെ മി മുതൽ മൂന്ന് മീറ്റർ വരെ നീളമുണ്ടാകും. തണ്ടുകൾക്കും ഇലകൾക്കും വെളുത്ത നിറത്തിൽ മൃദുവായ മുള്ളുകളുടെ ആവരണമുണ്ട്. ഇലകൾ വൃത്താകൃതിയിലോ ദീർഘവൃത്താകൃതിയിലോ ദിർഘചതുരാകൃതിയിലോ 1 - 8 സെ മി നീളത്തിലും,0.5 - 5 സെ മി വീതിയിലും കാണപ്പെടുന്നു. പൂക്കൾക്ക് വെള്ള, പിങ്ക്; കായ്കൾക്ക് കടുത്ത തവിട്ടു മുതൽ ഇളം ചുവപ്പു വരെ നിറങ്ങൾ. 70 മുതൽ 200 ദിവസങ്ങൾ കൊണ്ട് പുഷ്പിക്കുന്നു. പകൽ ദൈർഘ്യം കുറയുമ്പോൾ ഈ സസ്യം പുഷ്പിച്ചു തുടങ്ങുന്നു.

• കാട്ടുഴുന്നിന്റെ  സക്രിയഘടകം കുമാറിൻ വിഭാഗത്തിലെ ആൽക്കല്ലൊയിഡുകളാണ്. അതിൽ പ്രധാനമയുള്ള ഫ്രക്സിഡിന് രക്തത്തിലെ പഞ്ചസാരയുടെ അളവ് കുറയ്ക്കുവാൻ ശേഷിയുണ്ട്.
• കാട്ടുഴുന്നിന്റെ തണ്ടുകളിൽ നിന്ന് വേർതിരിച്ചെടുത്ത ഫ്ലേവനോൾ ഗ്ലൈക്കോസൈഡ് (C₂₆H₂₈O₁₇) എന്ന് തന്മാത്രയ്ക്ക് ബാക്റ്റീരിയകൾക്കും കൂണുകൾക്കുമെതിരേ പ്രവർത്തിക്കുവാനുള്ള കഴിവുണ്ട്.
• വേരൊഴികെയുള്ള ഭാഗങ്ങളിൽ നിന്ന് വേർതിരിച്ചെടുത്ത ബെർജെനിൻ (C ₁₄ H ₁₆ O ₉), ഡൈഡ്സിൻ (C ₂₁ H ₂₁ O ₉), വിറ്റെക്സിൻ (C ₂₁ H ₂₀ O ₁₀), 3-O-methyl-D- chiro ഇനോസിറ്റോൾ (C ₇ H ₁₄ O ₆) എന്നീ തന്മാത്രകൾക്ക് വേദന സംഹാര ഗുണങ്ങളുണ്ട്

കാട്ടുമരോട്ടി, വിളമരം, ആറ്റുചങ്കള, മലമരവെട്ടി, മാൽമുരുട്ടി, മരവെട്ടി, പിനർവെട്ടി (ശാസ്ത്രീയനാമം: Hydnocarpus alpina ).

• ചിത്രങ്ങൾ (Vinayaraj)

8 മീറ്ററോളം ഉയരം വയ്ക്കുന്ന ചെറുമരമാണ് കാട്ടുമരോട്ടി. (ശാസ്ത്രീയനാമം: Hydnocarpus alpina ). വിളമരം, ആറ്റുചങ്കള, മലമരവെട്ടി, മാൽമുരുട്ടി, മരവെട്ടി, പിനർവെട്ടി എന്നെല്ലാം അറിയപ്പെടുന്നു. നിത്യഹരിതവൃക്ഷം. ദക്ഷിണേന്ത്യയിലും ശ്രീലങ്കയിലും കാണുന്നു. ഔഷധഗുണങ്ങളുണ്ട്. മരോട്ടിശലഭം മുട്ടയിടുന്നത് മരോട്ടിയിലും കാട്ടുമരോട്ടിയിലുമാണ്.

കാട്ടുമഞ്ഞൾ. (ശാസ്ത്രീയനാമം: Curcuma pseudomontana)

• ചിത്രങ്ങൾ (flowersofindia)

പശ്ചിമഘട്ട തദ്ദേശവാസിയായ ഒരു ഔഷധസസ്യമാണ് കാട്ടുമഞ്ഞൾ. (ശാസ്ത്രീയനാമം: Curcuma pseudomontana). ഉയരം കൂടിയ ഇടങ്ങളിലെ നനവും തണലുമുള്ള കാടുകളിൽ കണ്ടുവരുന്നു. ആന്ധ്രയിലെ പല വർഗ്ഗക്കാരും ഇതിന്റെ കിഴങ്ങ് മഞ്ഞപ്പിത്തം ചികിൽസിക്കാനും മുലപ്പാൽ വർദ്ധിപ്പിക്കാനും ശരീരം തണുപ്പിക്കാനുമെല്ലാം ഉപയോഗിക്കുന്നു.

പുകയില (ശാസ്ത്രീയനാമം: Nicotiana tabacum - നിക്കോട്ടിയാന ടബാക്കം)

നിക്കോട്ടിയാന ജനുസ്സിൽ ഉൾപ്പെടുന്ന ഒരു സസ്യമാണ് പുകയില (ശാസ്ത്രീയനാമം: Nicotiana tabacum - നിക്കോട്ടിയാന ടബാക്കം). പ്രാദേശികമായി ഇവ പൊകല എന്നും അറിയപ്പെടുന്നു. നിക്കോട്ടിൻ എന്ന ആൽക്കലോയ്ഡ് ഇതിൽ അടങ്ങിയിരിക്കുന്നു. നിക്കോട്ടിൻ ഏറ്റവുമധികം അടങ്ങിയിരിക്കുന്നതും പുകയിലച്ചെടിയിലാണ്.

പുകയിലയുടെ വേരിലാണ് നിക്കോട്ടിൻ ആദ്യമുണ്ടാകുന്നത്. പിന്നീട് വേരിൽ നിന്ന് ഇലകളിലേക്ക് പ്രതിസ്ഥാപിക്കപ്പെടുന്നു. 
സിട്രിക്, മാലിക് അമ്ലങ്ങളുടെ നിഷ്ക്രിയലവണങ്ങളായാണ് ഇലകളിൽ നിക്കോട്ടിൻ സ്ഥിതിചെയ്യുന്നത്. പുകയിലച്ചെടിയിൽ നിന്ന് ഇലകൾ മാറ്റിയശേഷം വേര്, ഞെട്ട് എന്നിവയിൽ നിന്നാണ് നിക്കോട്ടിൻ വേർതിരിച്ചെടുക്കുന്നത്. സിഗററ്റ്, സിഗാർ, ബീഡി എന്നിവയ്ക്കായി ഇല ഉപയോഗപ്പെടുത്തുന്നു. നേർപ്പിച്ച അമ്ലലായനിയുപയോഗിച്ചാണ് പുകയിലയിൽ നിന്ന് നിക്കോട്ടിൻ നിഷ്കർഷണം ചെയ്തെടുക്കുന്നത്.
കേരളത്തിലെ കാസർഗോഡ് ജില്ലയിലെ ചില പ്രദേശങ്ങളിൽ പുകയിലച്ചെടി വ്യാവസായികാടിസ്ഥാനത്തിൽ കൃഷി ചെയ്യുന്നുണ്ട്.

കാട്ടുപൊന്നാങ്കണ്ണി (ശാസ്ത്രീയനാമം: Alternanthera bettzickiana)

തെക്കേ അമേരിക്കൻ വംശജയായ ഒരു കുറ്റിച്ചെടിയാണ് കാട്ടുപൊന്നാങ്കണ്ണി. (ശാസ്ത്രീയനാമം: Alternanthera bettzickiana). അലങ്കാരച്ചെടിയായി നട്ടുവളർത്തുന്ന ഈ സസ്യത്തിന്റെ ഇല തോരൻ ഉണ്ടാക്കാൻ കേരളത്തിൽ ഉപയോഗിക്കാറുണ്ട്. ചൈനയിൽ എല്ലായിടത്തും നട്ടുവളർത്താറുണ്ട്.

കാട്ടുപെരണ്ട, വാതക്കൊടി, ചൊറിവള്ളി (ശാസ്ത്രീയനാമം: Cayratia trifolia).

• ചിത്രങ്ങൾ

ഒരു ചെറിയ വള്ളിച്ചെടിയാണ് കാട്ടുപെരണ്ട. (ശാസ്ത്രീയനാമം: Cayratia trifolia).വാതക്കൊടി, ചൊറിവള്ളി എന്നെല്ലാം പേരുകളുണ്ട്. ഉപയോഗപ്രദമായ് പല സംയുക്തങ്ങളും തണ്ടിലും വേരിലും ഇലയിലും അടങ്ങിയിട്ടുണ്ട്. വർഷം മുഴുവൻ പുഷ്പിക്കുന്ന ഈ ചെടി നിത്യഹരിത-അർദ്ധനിത്യഹരിതവനങ്ങളിലും കണ്ടൽക്കാടികളിലും സമതലങ്ങളിലും കാണാറുണ്ട്. പലവിധ ഔഷധഗുണങ്ങളുള്ള ഒരു സസ്യമാണിത്.

ആലാഞ്ചി

പശ്ചിമഘട്ട തദ്ദേശവാസിയായ ഒരു ചെറിയ മരമാണ് ആലാഞ്ചി അഥവാ കാട്ടുപൂവരശ്. (ശാസ്ത്രീയനാമം: Rhododendron arboreum Smith ssp. nilagiricum (Zenk.) Tagg.).10 മീറ്റർ വരെ ഉയരം വയ്ക്കുന്ന ഈ മരം 1500 മീറ്ററിനും 2400 മീറ്ററിനും ഇടയിലുള്ള നിത്യഹരിതവനങ്ങളിൽ അപൂർവ്വമായി കാണുന്നു.

കാട്ടുപൂവരശ് , കാട്ടുപരുത്തി (ശാസ്ത്രീയനാമം: Thespesia lampas)

കാട്ടുപൂവരശ് എന്നും അറിയപ്പെടുന്ന കാട്ടുപരുത്തി 2-3 മീറ്റർ വരെ ഉയരം വയ്ക്കുന്ന ഒരു ചെറിയ കുറ്റിച്ചെടിയാണ്. (ശാസ്ത്രീയനാമം: Thespesia lampas). ഗൊണേറിയ, സിഫിലിസ് എന്നീ രോഗങ്ങൾക്ക് ഈ ചെടിയുടെ വേരും കായും ഔഷധമായി ഉപയോഗിക്കാറുണ്ട്. തൊലിയിലെ നാര് വള്ളിയായി ഉപയോഗിക്കുന്നു. മഹാരാഷ്ടയിലെ കൊർക്കു വിഭാഗക്കാർ മഞ്ഞപ്പിത്തത്തിന്റെ ചികിൽസയ്ക്ക് കാട്ടുപരുത്തി മരുന്നായി ഉപയോഗിക്കുന്നുണ്ട്.

കാട്ടുപടവലം അഥവാ കയ്പൻ പടവലം

പടവലങ്ങളിൽ വച്ച് ഔഷധരൂപേണ ഉപയോഗിക്കുവാൻ ഏറ്റവും യോജിച്ചതാണ്‌ കാട്ടുപടവലം അഥവാ കയ്പൻ പടവലം.കേരളത്തിലെ വനപ്രദേശങ്ങളിലും ബംഗാൾ സംസ്ഥാനത്തിലുമാണ് കാട്ടുപടവലം കൂടുതലായി കാണുന്നത്. ഇതിന്റെ പച്ചക്കായ ഭക്ഷണമായി ഉപയോഗിക്കുന്നു. അന്നജം, ജീവകം എ, ജീവകം സി കൂടാതെ മഗ്നീഷ്യം, പൊട്ടാസ്യം, ചെമ്പ്, ഗന്ധകം, ക്ലോറിൻ തുടങ്ങിയ ധാതുക്കളും ചെറിയ അളവിൽ കാട്ടുപടവലത്തിൽ കാണുന്നു.

ഉയരത്തിലേക്ക് പടരുന്ന മൃദുലതാസസ്യമാണ്. രൂപത്തിൽ കോവയ്ക്കായോട് സാദൃശ്യമുണ്ട്. ഇലകൾ സാധാരണ പടവകത്തേക്കാൾ ചെറുതാണ്. പച്ചയിൽ വെള്ള വരകൾ കായുടെ പ്രത്യേകതയാണ്. ഇത് അധികം നീളത്തിൽ വളരാറില്ല. കായ്കൾ 9 സെന്റീമീറ്റർ വരെ നീളത്തിൽ വളരുന്നു. ആൺചെടിയും പെൺചെടിയും പ്രത്യേകമായുണ്ട്. കായ്കൾക്ക് കയ്പ്പുണ്ടെങ്കിലും ഭക്ഷ്യയോഗ്യമാണ്. പൂക്കൾക്ക് വെളുത്ത നിറമാണ്.
ഔഷധ ഗുണങ്ങൾ

• കായ പിഴിഞ്ഞ നീര് വിരേചന ഔഷധമായി ഉപയോഗിക്കാം.
• വള്ളി കൊണ്ടുള്ള കഷായം ശ്വാസകോശത്തിലെ കഫം ചുമപ്പിച്ച് കളയുവാൻ സഹായിക്കുന്നു. (Expectorant)
• കുഷ്ഠരോഗ, മസൂരി ചികിത്സയിൽ കാട്ടുപടവലം ഉത്തമ ഔഷധമായി ഗണിച്ചിരുന്നു.

വേർ, ഇല, തണ്ട്, പൂവ്, കായ് എന്നിവ കാട്ടുപടവലത്തിൻറെ ഔഷധയോഗ്യഭാഗങ്ങളാൺ.

ഞണ്ടുമുട്ട, പുളിച്ചി, പൂണൂൽമരം, നാരമ്പിളി, നീരാഞ്ചി, കാട്ടുനൊച്ചി

ഞണ്ടുമുട്ട, പുളിച്ചി, പൂണൂൽമരം, നാരമ്പിളി, നീരാഞ്ചി എന്നെല്ലാം പേരുകളുള്ള കാട്ടുനൊച്ചി 5 മീറ്ററോളം ഉയരം വയ്ക്കുന്ന വലിയ ഒരു കുറ്റിച്ചെടിയാണ്. (ശാസ്ത്രീയനാമം: Debregeasia longifolia). 1800 മീറ്റർ വരെ ഉയരമുള്ള നിത്യഹരിതവനങ്ങളുടെ ഓരങ്ങളിൽ കാണുന്നു. തടി കരിയുണ്ടാക്കാൻ നല്ലതാണ്. തടിയിൽ നിന്നും ലഭിക്കുന്ന നാര് വീടും മീൻവലയും ഉണ്ടാക്കാൻ ഉപയോഗിക്കുന്നു.

കാട്ടുനെല്ലി. (ശാസ്ത്രീയനാമം: Phyllanthus polyphyllus)

നെല്ലിയോട് വളരെ സാമ്യമുള്ള ഒരു ചെറുവൃക്ഷമാണ് കാട്ടുനെല്ലി. (ശാസ്ത്രീയനാമം: Phyllanthus polyphyllus). പാറ നിറഞ്ഞ ഇടങ്ങളിൽ വളരുന്ന ഈ മരം തെക്കേ ഇന്ത്യയിലേ കാണാറുള്ളൂ. 1200 മീറ്റർ വരെ ഉയരമുള്ള വരണ്ട നിത്യഹരിതവനങ്ങളിൽ കാണുന്ന ഈ മരം കേരളത്തിൽ അഗസ്ത്യമലയിലാണ് കണ്ടുവരുന്നത്.

ചുവന്നനിരൂരി, പാവലപ്പൂള, കാട്ടുനിരൂരി.(ശാസ്ത്രീയനാമം: Breynia vitis-idaea)

ചുവന്നനിരൂരി, പാവലപ്പൂള എന്നെല്ലാം അറിയപ്പെടുന്ന ഒരു വലിയ കുറ്റിച്ചെടിയാണ് കാട്ടുനിരൂരി.(ശാസ്ത്രീയനാമം: Breynia vitis-idaea). 4 മീറ്റർ വരെ ഉയരം വയ്ക്കും. ടോൺസിലിറ്റിസ്, പ്രമേഹം തുടങ്ങി പല രോഗങ്ങൾക്കും ഔഷധമാണ്. Epicephala sphenitis, Acrocercops rhothogramma എന്നീ നിശാശലഭങ്ങളുടെ ലാർവ ഈ ചെടിയിലാണ് വളർന്നുവരുന്നത്.

കാട്ടുനാരകം (ശാസ്ത്രീയനാമം: Atalantia monophylla)

രണ്ടര മീറ്റർ വരെ ഉയരത്തിൽ വളരുന്ന മുള്ളുകളുള്ള ഒരു വലിയ കുറ്റിച്ചെടിയാണ് കാട്ടുനാരകം. (ശാസ്ത്രീയനാമം: Atalantia monophylla). പലവിധ ഔഷധമൂല്യങ്ങളുള്ള ഒരു ചെടിയാണിത്. ഫ്ലോറിദയിൽ ഇത് ഒരു അലങ്കാരസസ്യമായി വളർത്തിവരുന്നു. കമ്പുനട്ടോ വിത്തുവഴിയോ പ്രജനനം നടത്താം. കുരുവിൽനിന്നു കിട്ടുന്ന എണ്ണ പഴക്കം ചെന്ന വാതത്തിനും, പക്ഷപാതത്തിന്നും ഉപയോഗിക്കുവാൻ നല്ലതാകുന്നു. കൊങ്കണ രാജ്യത്തു ഇല പിഴിഞ്ഞു എടുക്കുന്ന നീർ പക്ഷപാതത്തിനു കുഴമ്പ് ഉണ്ടാക്കാനുപയോഗിക്കുന്നു.

കാട്ടുതുളസി

സുമുഖം എന്ന സംസ്കൃത നാമത്തിലും Shrubby Basil, African Basil തുടങ്ങിയ ആംഗലേയ നാമങ്ങളിലും അറിയുന്ന കാട്ടുതുളസിയുടെ ശാസ്ത്രനാമം ഓസ്സിമം ഗ്രാറ്റിസ്സിമം (Ocimum gratissimum) എന്നാണ്. അനിച്ചിൽ, രാജിക എന്നീ പേരുകളും ആയുർവ്വേദാചാര്യന്മാർ ഉപയോഗിച്ചിരുന്നു.

ഔഷധഗുണങ്ങൾ

• ഉത്തേജകം
• കഫം ചുമപ്പിച്ചുകളയുവാൻ
• ഗോണോറിയ ച്കിത്സയിൽ
• ശിശുക്കളിൽ ഛർദ്ദി ചികിത്സിക്കുവാൻ
• വാത രോഗങ്ങൾ
• വേര് വേദനസംഹാരിയാണ്
• കുട്ടികളിലെ വായ്പ്പുണ്ണിന്
• ഉണക്കിപ്പൊടിച്ച ഇല വൃണങ്ങൾ വച്ചുകെട്ടുന്നതിന്
• മലമ്പനി

കാട്ടുഞെരിഞ്ഞിൽ (ശാസ്ത്രീയനാമം: Acanthospermum hispidum)

ഏകവർഷിയായ ഒരു കുറ്റിച്ചെടിയാണ് കാട്ടുഞെരിഞ്ഞിൽ. (ശാസ്ത്രീയനാമം: Acanthospermum hispidum). തെക്കേ അമേരിക്കൻ വംശജനാണ്. കേരളത്തിൽ എല്ലാ ജില്ലകളിലും കാണാറുണ്ട്. ഏതു തരം ചുറ്റുപാടീലും വളരാനുള്ള ശേഷിയുണ്ട്. പലതരം കൃഷിക്കും ഇതൊരു കളയായാണ് കരുതിപ്പോരുന്നത്.

ഞെരിഞ്ഞില്‍

കാട്ടുഗോതമ്പ്. (ശാസ്ത്രീയനാമം: Coix lacryma-jobi)

ധാന്യത്തിനായും അലങ്കാരച്ചെടിയായും നട്ടുവളർത്തുന്ന ഒരു പുൽച്ചെടിയാണ് കാട്ടുഗോതമ്പ്. (ശാസ്ത്രീയനാമം: Coix lacryma-jobi). ഇത് ഒരു ഔഷധസസ്യം കൂടിയാണ്. Job's Tears എന്ന് പൊതുവേ അറിയപ്പെടുന്നു. പുള്ളിശരശലഭം ഇതിന്റെ ഇലകളിൽ മുട്ടയിടുന്നു. പലരാജ്യങ്ങളിലും ഭക്ഷണാവശ്യത്തിനും മദ്യമുണ്ടാക്കാനും ഈ ചെടി ഉപയോഗിക്കുന്നുണ്ട്.

മക്കിപ്പൂവ്, മാസീപത്രി, അനന്തൻപച്ച, കാട്ടുകർപ്പൂരം (ശാസ്ത്രീയനാമം: Artemisia nilagirica)

മക്കിപ്പൂവ്, മാസീപത്രി, അനന്തൻപച്ച എന്നെല്ലാം അറിയപ്പെടുന്ന കാട്ടുകർപ്പൂരം കേരളത്തിൽ എല്ലായിടത്തും തന്നെ കാണപ്പെടുന്ന ഒരു കളയാണ്. (ശാസ്ത്രീയനാമം: Artemisia nilagirica). ഇലകൾ ഞെരിച്ചാൽ ഒരു നറുമണം ഉള്ള ഈ ചെടി രണ്ടു മീറ്ററോളം ഉയരത്തിൽ വളരുന്നു. കീടങ്ങളെ തുരത്താൻ കഴിവുണ്ടെന്ന് കരുതപ്പെടുന്ന ഈ ചെടി അതിനാൽത്തന്നെ പെട്ടികളിലും അലമാരികളിലുമെല്ലാം സൂക്ഷിക്കാറുണ്ട്. ചിങ്ങി എന്നറിയപ്പെടുന്ന ഒരു നാടൻ കേശതൈലം ഉണ്ടാക്കി മണിപ്പൂരുകാർ ഉപയോഗിക്കാറുണ്ട്. പലവിധ ഔഷധഗുണങ്ങളുള്ള ഒരു സസ്യമാണ് കാട്ടുകർപ്പൂരം. കൊതുക് നിയന്ത്രണത്തിനും ഈ ചെടി ഉപയോഗിക്കാമെന്ന് പഠനങ്ങൾ കാണിക്കുന്നു. ബാക്ടീരിയകളെ നശിപ്പിക്കാൻ ഇതിന് ആവുമെന്നും ഗവേഷണങ്ങളിൽ കണ്ടെത്തിയിട്ടുണ്ട്.

കാട്ടുകൊടിവള്ളി (ശാസ്ത്രീയനാമം: Pachygone ovata)

മരങ്ങളിൽ കയറിപ്പോവുന്ന ഒരു വള്ളിച്ചെടിയാണ് കാട്ടുകൊടിവള്ളി. (ശാസ്ത്രീയനാമം: Pachygone ovata). ഇല പൊഴിക്കുന്ന ഈ വള്ളിച്ചെടിക്ക് അനുകൂല കാലാവസ്ഥയിൽ 15 മീറ്ററോളം വളരാൻ കഴിയും. കായ മൽസ്യങ്ങളെയും പേനിനെയും വിരകളെയും കൊല്ലാൻ ഉപയോഗിക്കാറുണ്ട്.

വലിയ കാട്ടുമുതിര എന്നും പേരുള്ള കാട്ടുകുന്നി

വലിയ കാട്ടുമുതിര എന്നും പേരുള്ള കാട്ടുകുന്നി കേരളത്തിൽ മിക്കയിടത്തും കണ്ടുവരുന്ന ഒരു വള്ളിച്ചെടിയാണ്. (ശാസ്ത്രീയനാമം: Abrus pulchellus). കുന്നിയെപ്പോലെ തന്നെ ഇതിന്റെ വിത്തിലും ഒരു വിഷം അടങ്ങിയിട്ടുണ്ട്.മിക്ക ഏഷ്യൻ രാജ്യങ്ങളിലും കാട്ടുകുന്നി കാണാറുണ്ട്.

അണ്ണക്കര, കാട്ടുനെല്ലി, കരയം, കൊസ്രാമ്പ, ഈച്ചക്കാര, കരുവേമ്പ്

അണ്ണക്കര, കാട്ടുനെല്ലി, കരയം, കൊസ്രാമ്പ, ഈച്ചക്കാര, കരുവേമ്പ് എന്നെല്ലാം അറിയപ്പെടുന്ന കാട്ടുകലശം 25 മീറ്റർ വരെ ഉയരം വയ്ക്കുന്ന ഒരു ഇലപൊഴിയും വൃക്ഷമാണ്. (ശാസ്ത്രീയനാമം: Garuga pinnata).

• ചിത്രങ്ങൾ

കാട്ടുകരണ. (ശാസ്ത്രീയനാമം: Gordonia obtusa). അടങ്ങി, ചെമ്പരശൻ, കരിക്കോവ, ഒല എന്നെല്ലാം പേരുകളുണ്ട്.

പശ്ചിമഘട്ടതദ്ദേശവാസിയായ ഒരു മരമാണ് കാട്ടുകരണ. (ശാസ്ത്രീയനാമം: Gordonia obtusa). അടങ്ങി, ചെമ്പരശൻ, കരിക്കോവ, ഒല എന്നെല്ലാം പേരുകളുണ്ട്. 10 മീറ്ററോളം ഉയരം വയ്ക്കും. ഉയരമുള്ള മഴക്കാടുകളുടെ ഓരം ചേർന്ന് നീലഗിരി, വയനാട്, കുടക് എന്നിവിടങ്ങളിൽ കാണുന്നു.ഔഷധം, തടി എന്നിവ വ്യാവസായിക പ്രാധാന്യമുള്ളതാണ്.

• ചിത്രങ്ങൾ

കാക്കത്തൊണ്ടി (ശാസ്ത്രീയനാമം: Capparis sepiaria). Wild Orange, Bumble

ദക്ഷിണേന്ത്യയിൽ മഴ കുറവുള്ള മലകളിൽ കണ്ടുവരുന്ന മുള്ളുകളുള്ള ചെറിയ കുറ്റിച്ചെടിയാണ് കാക്കത്തൊണ്ടി. (ശാസ്ത്രീയനാമം: Capparis sepiaria). Wild Orange, Bumble എന്നെല്ലാം അറിയപ്പെടുന്നു. ത്വക്‌രോഗചികിൽസയ്ക്കും പനിക്കുമെതിരെ ഔഷധമായി ഉപയോഗിക്കുന്നു. കരീരവുമായി നല്ല സാമ്യമുണ്ട്. ഫിലിപ്പൈൻസിലും ഈ ചെടി പലവിധ രോഗങ്ങൾക്കും ഔഷധമായി ഉപയോഗിച്ചുവരുന്നു. പെരുഞ്ചിറകൻ, പയനിയർ എന്നീ ശലഭങ്ങൾ കാക്കത്തൊണ്ടി ഇലയിൽ മുട്ടയിടാറുണ്ട്.